Familja e Martin Canit, në bashkëpunim me organizatën “Prindërit për Arsim Cilësor”, po zhvillojnë sot një homazh dhe marshim publik pranë shkollës 9-vjeçare “Fan Noli”, duke nisur nga ora 11:00. Ky aktivitet vjen në kujtim të 14-vjeçarit që humbi jetën tragjikisht pas një sulmi me thikë pranë shkollës më 18 nëntor.

Prindërit e Martinit kanë ngritur shqetësimin se askush nga prokuroria nuk i ka kontaktuar deri më tani dhe theksojnë se kërkesa e tyre e vetme është drejtësia për djalin e tyre.

Në marshim është i pranishëm edhe Luizi, shoku i Martinit, i cili mbeti i plagosur rëndë gjatë ngjarjes së rëndë që tronditi mbarë vendin.

Vrasja e Martin Canit hapi një debat të gjerë mbi rritjen e dhunës mes të rinjve dhe sigurinë në institucionet arsimore. Familjarët dhe qytetarët e mbledhur sot kërkojnë veprime konkrete për të parandaluar raste të ngjashme në të ardhmen dhe për të garantuar një mjedis më të sigurt për fëmijët.