Me trishtim të madh bëhet e ditur ndarja nga jeta e Joana Qyli, pjesë e stafit të Konsullatës së Përgjithshme të Shqipërisë në Selanik. Lajmin e trishtë e shpërndau vetë konsullata në një postim në Facebook, duke e përshkruar si një vajzë plot jetë, mirësi dhe dashuri për jetën, familjen dhe miqtë.

“Si pjesë e stafit të Konsullatës në një periudhë jo të shkurtër, Joana fitoi respektin dhe ngrohtësinë e kolegëve dhe të qytetarëve që me aq korrektësi u shërbeu. Edhe pse në një rrugëtim të shkurtër me jetën, ajo arriti ta ndërtojë atë bukur, me ngjyrat e shpresës dhe forcën për të mposhtur dhimbjen. Ngushëllimet më të ndjera familjes dhe të afërmve të dashur për këtë humbje të pafjalë. Qofsh e parajsës Joana Qyli”, shkruhet në postim.

Për ndarjen e parakohshme nga jeta ka reaguar edhe kreu i Kuvendit, Niko Peleshi, i cili shprehu ngushëllimet për familjen Qyli:

“Joana, vajza e mikut tim Thoma Qyli, u nda nga jeta në një moshë ku gjithçka duhej të kishte filluar. Një vajzë e mirë, me shpirt të pastër, e talentuar, me etje për dije, plot dritë dhe jetë. Nuk ka fjalë që mund të ngushëllojnë një prind për humbjen e fëmijës, por mendimet dhe lutjet janë me familjen Qyli në këtë dhimbje të pamatë. U prehtë në paqe Joana, dhe kujtimi i saj qoftë dritë përjetë.”

Ndarja e saj e parakohshme lë një boshllëk të madh në zemrat e familjarëve, kolegëve dhe të gjithë atyre që e njohën Joana Qyli.