Gjevalin Ndue Lika, 42 vjeç, ka humbur jetën në Spitalin Rajonal të Shkodrës pas një arresti kardiak. Ai u transportua me urgjencë në spital pasi kishte marrë ndihmën e parë nga shërbimi shëndetësor i Institucionit të Ekzekutimit të Vendimeve Penale (IEVP) Lezhë, ku vuante dënimin prej disa vitesh.

Lika ishte i diagnostikuar me skizofreni dhe trajtohej me medikamentin Resperidon, një ilaç i specializuar për çrregullime mendore. Në vitin 2015, ai ishte arrestuar për dhunë në familje dhe mbahej nën masë mjekësore të detyruar, një vendim i dhënë nga Gjykata e Tiranës.

Në vitin 2021, Lika u transferua nga IEVP Krujë në IEVP Lezhë, ku vazhdoi trajtimin e tij deri në momentet fatale. Drejtoria e Përgjithshme e Burgjeve ka shprehur ngushëllimet për familjen e tij, duke theksuar dhimbjen për humbjen e parakohshme të këtij personi.