Policia ka finalizuar operacionin e koduar “Filizat”, duke arrestuar tetë persona që dyshohen se shfrytëzonin fëmijë të mitur për punë dhe lypje.

Katër prej të arrestuarve – Eles Brahimaj, Rakip Sinani, Mikel Rama dhe Miklovan Gogaj – janë lënë nën masën e sigurisë “Arrest në burg”, ndërsa katër gra të moshës 35 vjeç janë vendosur nën masën “Arrest në shtëpi”.

Hetimet disa mujore zbuluan se fëmijët, të moshave 9–11 vjeç, detyroheshin të punonin kryesisht gjatë natës ose të lypnin në zona të ndryshme të kryeqytetit, si pjesë e veprimeve të koordinuara nga të arrestuarit, individualisht dhe në bashkëpunim me njëri-tjetrin.

Sipas njoftimit zyrtar të Policisë së Tiranës:

“Si rezultat i veprimeve hetimore dhe operacionale të kryera nga Komisariati i Policisë Nr. 2, në drejtim të Prokurorisë së Tiranës, u finalizua operacioni i koduar ‘Filizat’, me qëllim identifikimin dhe nxjerrjen përpara përgjegjësisë penale të shtetasve që shfrytëzojnë fëmijët për të punuar dhe/ose për të lypur.”

Operacioni tregon angazhimin e institucioneve për të mbrojtur të drejtat e fëmijëve dhe për të goditur fenomenin e shfrytëzimit të tyre për përfitim financiar.