Policia ka identifikuar autorin e plagosjes me thikë të 26-vjeçarit Kostandin Ziu, i cili u paraqit mbrëmjen e së enjtes në spital me një plagë në qafë. Blutë bëjnë me dije se autori i dyshuar është 22-vjeçari me inicialet J. R., dhe po vijojnë kërkimet për kapjen e tij.

Sipas hetimeve paraprake, ngjarja ka ndodhur pas një konflikti fizik mes dy të rinjve, i cili ka përfunduar me përdorimin e një mjeti prerës nga autori.

Gjendja shëndetësore e të plagosurit raportohet të jetë jashtë rrezikut për jetën. Megjithatë, për shkak të plagës në pjesën e pasme të qafës, ai ka pasur nevojë për ndërhyrje më të specializuar dhe është transportuar drejt Spitalit të Traumës në Tiranë.

Policia po vijon kërkimet për kapjen e autorit, ndërsa grupi hetimor, në bashkëpunim me Prokurorinë, po punon për të sqaruar rrethanat e ngjarjes dhe për dokumentimin e plotë ligjor të rastit.