Tiranë – Një tjetër rast i rëndë i falsifikimit të dokumenteve është zbuluar nga Policia e Tiranës, e cila finalizoi me sukses operacionin e koduar “Identiteti”, pas një hetimi intensiv 7-mujor të zhvilluar nën drejtimin e Prokurorisë dhe me përdorimin e metodave speciale të hetimit.

Në pranga kanë rënë dy shtetas, Ylli dhe Pjerin Brahimaj, përkatësisht 65 dhe 45 vjeç, babë e bir. Ylli Brahimaj ishte aktualisht me masë sigurie “Arrest në shtëpi” nga SPAK, për përfshirje të mëparshme në një grup kriminal me të njëjtën veprimtari.

Gjithashtu, është proceduar penalisht shtetasi Sh. L., 62 vjeç, i dyshuar si bashkëpunëtor i tyre.

Sipas njoftimit zyrtar të Drejtorisë Vendore të Policisë Tiranë, gjatë kontrollit të ushtruar në banesën e të arrestuarve, u zbulua një ambient i përshtatur në mënyrë të sofistikuar si laborator për falsifikimin e dokumenteve dhe pasaportave. Aty u sekuestruan dokumente të dyshuara si të falsifikuara, pajisje dhe sende të tjera që shërbenin për prodhimin e identiteteve të rreme.

Falsifikimet kishin për qëllim ndihmën për kalime të paligjshme të kufirit, një veprimtari kriminale me pasoja të rënda në nivel kombëtar dhe ndërkombëtar.

Hetimet vijojnë për të identifikuar persona të tjerë të përfshirë në këtë rrjet dhe për të zbardhur të gjitha lidhjet e mundshme me raste të mëparshme të trafikimit të paligjshëm të shtetasve jashtë vendit.