Kreu i Partisë së Lirisë, Ilir Meta, ka kërkuar nga simpatizantët dhe anëtarët e partisë të organizojnë protesta paqësore para Strukturës së Posaçme kundër Korrupsionit dhe Krimit të Organizuar (SPAK), për të denoncuar atë që ai e cilëson si manipulime dhe abuzime në hetimet ndaj tij. Në një letër publike të shpërndarë përmes sekretarit të partisë, Tedi Blushi, Meta kërkoi që protestat të zhvillohen periodikisht dhe të denoncohen, sipas tij, aferat e shumta që ai pretendon se SPAK nuk i heton.

“Protestat paqësore periodike para SPAK duhet të nisin për të denoncuar të gjitha manipulimet skandaloze të tyre në dosjen kundër meje dhe për të denoncuar aferat skandaloze të Edi Ramës që SPAK nuk i heton,” u shpreh Meta në mesazhin e tij.

Kërkesa e Metës për organizimin e protestave erdhi një ditë pas vendimit të Gjykatës së Posaçme të Apelit (GJKKO), e cila vendosi të mos ndryshojë masat e sigurisë për të, duke e lënë atë në arrest me burg, ndërsa për Monika Kryemadhin, masën e “detyrimit për t’u paraqitur”.

Po ashtu, ditën e sotme, SPAK vendosi të sekuestrojë dy shtëpi të Monika Kryemadhit dhe nënës së saj, Fatimes, në Kodrën e Diellit në Tiranë. Meta dhe Kryemadhi janë nën akuzë për korrupsion, pastrim parash dhe fshehje pasurie, përfshirë akuza për lobimin në SHBA dhe një sërë çështjesh të tjera të mosdeklarimit të pasurive.

Nëse protesta do të mbahet, ajo do të jetë e para e këtij lloji për një ish-zyrtar të lartë të shtetit të akuzuar për veprat korruptive.