Presidenti i Partisë së Lirisë, Ilir Meta, ka përgëzuar qytetarët dhe klasën politike në Kosovë për zhvillimin e një procesi zgjedhor tërësisht paqësor dhe të rregullt.

Në një postim në Facebook, Meta e cilësoi këtë proces si një model për funksionimin e demokracisë dhe garantimin e votës së lirë.

“Urimet më të mira qytetarëve dhe klasës politike në Kosovë, që nëpërmjet procesit të sotëm tërësisht paqësor dhe shumë të rregullt të votimit dhanë sërish një shembull të shkëlqyer të funksionimit të demokracisë, shtetit ligjor dhe garantimit të votës së lirë,” shkroi Meta.

Ai krahasoi situatën në Shqipëri me atë të Kosovës, duke e cilësuar këtë të fundit si një model që duhet ndjekur për të shpëtuar demokracinë dhe shtetin e së drejtës.

“Për Shqipërinë, që vuan nën thundrën e Narkoqeverisjes dhe përpjekjeve kriminale për asgjësimin e pluralizmit politik përmes shkatërrimit të zgjedhjeve të lira dhe të ndershme, Kosova është një shembull i jashtëzakonshëm dhe rruga e vetme që duhet ndjekur për të shpëtuar demokracinë dhe shtetin e së drejtës,” theksoi Meta.