Drejtori i Përgjithshëm i Policisë së Shtetit, Ilir Proda, zhvilloi një vizitë në repartin e djegieve në QSUT ku po trajtohet Agim Troci, Shefi i Komisariatit të Delvinës, i cili u lëndua rëndë teksa shpëtoi një fëmijë 10-vjeçar dhe një të moshuar nga flakët në fshatin Vergo.

Proda, i shoqëruar nga drejtues të lartë të Policisë, e vlerësoi aktin e Trocit si heroik, duke shprehur mirënjohje për të gjithë efektivët që rrezikuan jetën për qytetarët. Ai përmendi edhe kontributin e Nënkomisarit Eridion Lame, i cili u asfiksua gjatë ndërhyrjes dhe ndodhet nën kujdes mjekësor në Delvinë.

Ndërkohë, në zonat e prekura nga flakët në Senicë, Vergo dhe Kopaçez vijon puna e zjarrfikësve, policisë, ushtrisë dhe emergjencave civile për të mbajtur situatën nën kontroll.