Presidentja e Meksikës, Claudia Sheinbaum, ka njoftuar se do të padisë një burrë që e ngacmoi seksualisht gjatë një dalje publike pranë Pallatit Kombëtar në Mexico City.

Ngjarja ndodhi të martën, kur Sheinbaum po përshëndeste qytetarët. Në një video të publikuar në rrjetet sociale, shihet një burrë që i afrohet nga pas dhe përpiqet ta puthë në qafë, duke vendosur duart mbi të. Presidentja reagoi menjëherë dhe u largua, ndërsa stafi i saj ndërhyri dhe autorin e arrestoi policia.

“Nëse unë nuk bëj kallëzim, çfarë do të ndodhë me gratë e tjera në vendin tonë? Nëse e bëjnë këtë ndaj presidentes, imagjinoni çfarë ndodh me gratë e zakonshme,” deklaroi Sheinbaum gjatë një konference për shtyp.

Ky incident rikthen vëmendjen mbi sigurinë e grave dhe rëndësinë e reagimit ligjor ndaj ngacmimeve publike në Meksikë.