Kandidatja e Partisë Demokratike për Bashkinë e Sarandës, Ina Zhupa, zhvilloi sot një takim me demokratët e zonës, në kuadër të fushatës elektorale për zgjedhjet e 11 majit. Në një fjalim të zjarrtë, Zhupa theksoi se shqiptarët po përballen me kërcënimin e shpopullimit dhe korrupsionit, duke akuzuar qeverinë për kapjen e burimeve natyrore dhe përjashtimin e qytetarëve nga pasuritë e vendit.

“Deti, nga qytetarët, po bëhet ekskluzivitet i oligarkëve. Ky është një vend i bekuar nga Zoti dhe është ndëshkuar nga një qeveri grabitëse,” u shpreh Zhupa.

Duke iu referuar një shprehjeje të përdorur në Sarandë – “ik se do të jap një pesë” – Zhupa e përdori si simbolikë për të sulmuar qeverinë, duke e cilësuar “numrin pesë” si kërcënim për qytetarët.

“Ata janë kërcënim për shqiptarët, janë dhunues për shqiptarët, janë shpopullues për shqiptarët dhe do ta marrin përgjigjen e merituar në 11 Maj, nga njishat nga ju,” tha Zhupa para mbështetësve të saj.

Kandidatja e PD-së deklaroi se partia e saj ka një ndër programet më të mira që është ofruar ndonjëherë dhe u zotua për një qeverisje me vlera, duke u fokusuar te tradita, atdhedashuria dhe dinjiteti.

“Ne jemi njerëz të lidhur me traditën, jemi njerëz atdhetarë, jemi njerëz me dinjitet, jemi njerëz që e duam dhe do të punojmë për një Shqipëri madhështore,” përfundoi Ina Zhupa, duke theksuar rëndësinë e pjesëmarrjes në votime për të sjellë ndryshimin.