Deputetja e Partisë Demokratike, Ina Zhupa, mbajti një deklaratë para ambienteve të Kuvendit, pasi deputetët e opozitës zgjodhën të bojkotojnë seancën e sotme dhe në shenjë proteste dogjën karriget e Kuvendit. Në fjalën e saj, Zhupa akuzoi Kryeministrin Edi Rama për shkelje të rëndë të rendit kushtetues dhe për burgosjen e padrejtë të deputetit të opozitës, Ervin Salianji.

“Siç e patë, ne sot simbolikisht dogjëm karriget, por në fakt Edi Rama ka djegur Kushtetutën dhe rendin kushtetues në këtë vend. Ai ka kapur çdo pushtet dhe tashmë kemi të paktën tre burgosje politike të eksponentëve të opozitës shqiptare: nga lideri Sali Berisha, te eurodeputeti Fredi Bejleri, dhe tani tek deputeti Ervin Salianji,” u shpreh Zhupa.

Zhupa theksoi se arrestimi i Salianjit është bërë “pa ligj,” duke qenë sipas saj, një veprim politik me urdhër të Edi Ramës. Ajo premtoi se Partia Demokratike është e vendosur të mbrojë Kushtetutën dhe të jetë në mbrojtje të popullit shqiptar, të cilët, sipas saj, janë të rrezikuar nga padrejtësitë e qeverisë aktuale.

“Kur këto padrejtësi ju bëhen deputetëve dhe liderëve të opozitës, shqiptarët janë të gjithë të rrezikuar dhe kanë nevojë për mbrojtjen e opozitës. Shqiptarët do të jenë të gjithë në rrugët e Tiranës më 7 Tetor, në orën 18:00, për të treguar se flaka do t’i dalë këtij sistemi nëse nuk respektohen liritë dhe të drejtat e njeriut dhe rendi kushtetues në Shqipëri,” përfundoi Zhupa.