Deputetja e Partisë Demokratike, Ina Zhupa, deklaroi se protesta e organizuar nga opozita sot do të jetë fillimi i një mosbindjeje civile, me synimin kryesor arritjen e një qeverie teknike. Në një lidhje direkte për mediat, Zhupa theksoi se protesta do të nisë me një marshim nga selia e Partisë Demokratike dhe më pas do të përhapet në të gjitha rrugët e Tiranës.

Zhupa vuri në dukje se kjo protestë do të jetë e ndryshme nga ato të mëparshme të opozitës, pasi revolta do të shprehet jo vetëm me fjalë, por edhe me veprime konkrete. Ajo theksoi se opozita ka thirrur qytetarët në një mosbindje civile që synon të përballet me qeverinë pa tejkaluar kufijtë e revolucioneve demokratike, si ato në Francë dhe Gjermani.

“Revolta jonë nuk është domosdoshmërisht kundër rendit kushtetues, por kundër qeverisë aktuale. Me fjalë e kemi provuar, por nuk ka pasur reagim,” tha Zhupa, duke theksuar se qeveria teknike është minimumi që opozita pret të arrijë përmes kësaj revolte.