India ka nënshkruar një kontratë të re me Francën për blerjen e 26 avionëve luftarakë “Rafale” të destinuar për flotën detare, njoftoi sot Ministria e Mbrojtjes në Nju Delhi. Marrëveshja, e cila përfshin edhe transferim teknologjie për integrimin e armëve të prodhuara në Indi, është vlerësuar në rreth 630 miliardë rupi (afërsisht 7,4 miliardë dollarë).

Kjo marrëveshje strategjike, e miratuar më parë nga kabineti indian i sigurisë, forcon më tej bashkëpunimin ushtarak midis Indisë dhe Francës. Dorëzimi i avionëve nga kompania franceze “Dassault Aviation” pritet të përfundojë deri në vitin 2030, ndërsa trajnimi i ekuipazheve do të zhvillohet si në Indi ashtu edhe në Francë.

Aktualisht, India ka në përdorim 36 avionë “Rafale” për forcat ajrore, ndërsa bashkëpunimi ushtarak mes dy vendeve përfshin gjithashtu manovra të përbashkëta në ajër, tokë dhe det.

Ky zhvillim vjen si pjesë e një plani të gjerë të Indisë për modernizimin e forcave të saj të armatosura, në një kohë kur konkurrenca dhe tensionet rajonale po shtohen.