Në ndeshjen e fundit të fazës së 1/8 së Kupës së Italisë, Interi triumfoi 2-0 kundër Udineses në “San Siro”, duke siguruar një biletë për në çerekfinale ku do të përballet me Lazion.

Përballja nisi në mënyrë dominuese për Interin, me Marko Arnautovic që shënoi golin e parë në minutën e 30-të, pas një asisti të saktë nga Taremi. Por ishte Kristjan Asllani, mesfushori i Kombëtares Shqiptare, ai që tërhoqi vëmendjen me një kryevepër në fundin e pjesës së parë. Në minutën e 45-të, Asllani shënoi direkt nga goditja e këndit, një gol spektakolar që njihet si “gol olimpik”.

Pas ndeshjes, Asllani ndau emocionet e tij:
“Goli olimpik? Nuk më kishte ndodhur asnjëherë më parë, por ishte fat. E rëndësishme është që fituam dhe jemi në çerekfinale. Jemi shumë të lumtur dhe duam të vazhdojmë kështu.”

Mesfushori luajti 63 minuta përpara se t’i linte vendin Calhanoglut, duke dhënë një paraqitje mbresëlënëse që është një mesazh i fortë për trajnerin Simone Inzaghi për vendin e tij në formacionin titullar.

Në pjesën e dytë, asnjë nga skuadrat nuk arriti të ndryshojë rezultatin, duke vulosur fitoren e Interit. Me këtë ndeshje, kompletohen çiftet e çerekfinaleve të Kupës së Italisë:

– Juventus – Empoli
– Bologna – Atalanta
– Milan – Roma
– Lazio – Inter

Interi, i udhëhequr nga një grup lojtarësh të motivuar, po shkon drejt trofeut me hapa të sigurt, ndërsa Kristjan Asllani vazhdon të tregojë se është një element i rëndësishëm për të ardhmen e klubit dhe Kombëtares Shqiptare.