Pas propozimit romantik të verës së kaluar, mbrojtësi i Interit, Benjamin Pavard, dhe modelja e njohur franko-kosovare, Kleofina Pnishi, i thanë “po” njëri-tjetrit në një ceremoni të rafinuar dhe të mbajtur larg vëmendjes së mediave.

Dasma u zhvillua në një prej vendeve më të bukura të Italisë jugore – Abacia e Trinisë së Shenjtë në Cava de’ Tirreni, provincë e Salernos – ku çifti organizoi një shërbesë fetare intime në praninë e familjarëve, miqve të ngushtë dhe disa emrave të njohur të botës së futbollit.

Në mesin e të ftuarve u panë yje si Nicolò Barella, Jamal Musiala, si dhe bashkëkombasit Kingsley Coman, Lucas Hernandez dhe Theo Hernandez, ky i fundit sapo i larguar nga Serie A pas një qëndrimi të gjatë me Milanin.

Pas ceremonisë, të sapomartuarit u larguan në mënyrë romantike me një Mercedes 190 SL klasik, duke bërë një ndalesë në Hotel Scapolatiello, një vend me histori dhe elegancë pranë abacisë. Më pas, festa u zhvendos në Gardens of Fuenti, në bregdetin piktoresk të Amalfisë, ku çifti festoi mes muzikës, ushqimit italian dhe panoramës përrallore të detit Mesdhe.

Benjamin dhe Kleofina konfirmuan lidhjen e tyre për herë të parë në vitin 2023, ndërsa tashmë kanë hyrë në një kapitull të ri të jetës së tyre, të rrethuar nga dashuria dhe mbështetja e të afërmve.