Ministri i Jashtëm iranian, Abbas Araghchi, deklaroi sot se Irani është i gatshëm për negociata indirekte me Shtetet e Bashkuara, pas ultimatumit të Presidentit Donald Trump për një marrëveshje të re bërthamore.

“Rruga është e hapur për negociata indirekte,” tha Araghchi, duke shtuar se bisedimet e drejtpërdrejta nuk janë të mundshme derisa SHBA të ndryshojë qasjen ndaj Republikës Islamike.

Tensionet bërthamore dhe sanksionet amerikane

Që nga 2018, kur Trump tërhoqi në mënyrë të njëanshme SHBA-në nga marrëveshja bërthamore dhe vendosi sanksione të reja kundër Iranit, marrëdhëniet mes dy vendeve kanë qenë të tensionuara. Në përgjigje, Teherani ka rritur pasurimin e uraniumit, duke e çuar në 60% pastërti – një nivel shumë afër pragut prej 90%, që lejon prodhimin e armëve bërthamore.

Trump, i cili është rikthyer në Shtëpinë e Bardhë, konfirmoi më 7 mars se i kishte dërguar një propozim negociatash Iranit, me qëllimin e parandalimit të zhvillimit të armëve bërthamore nga Teherani dhe paralajmëroi për ndërhyrje ushtarake nëse kjo nuk arrihet.

Vendet perëndimore, të udhëhequra nga SHBA, vazhdojnë të dyshojnë për ambiciet bërthamore të Iranit, ndërsa Teherani këmbëngul se programi i tij bërthamor është për qëllime civile dhe energjetike.

Ndërkohë, mbetet për t’u parë nëse ky hap i ri për negociata indirekte do të çojë në një marrëveshje të re apo përshkallëzim të mëtejshëm të tensioneve mes SHBA dhe Iranit.