Ministri i Jashtëm i Iranit, Abbas Araqchi, deklaroi të mërkurën se e drejta e Teheranit për të pasuruar uraniumin nuk është e negociueshme, në prag të raundit të dytë të bisedimeve bërthamore që pritet të zhvillohet këtë fundjavë në Romë, mes Iranit dhe Shteteve të Bashkuara.

Kjo deklaratë vjen pak ditë pas nisjes së negociatave të para në Oman, ku shteti i Gjirit ka marrë rolin e ndërmjetës. Bisedimet shënojnë takimin e parë të drejtpërdrejtë midis dy palëve që nga ardhja në pushtet e Presidentit amerikan Donald Trump, i cili ka kërcënuar vazhdimisht me veprime ushtarake nëse nuk arrihet një marrëveshje për programin bërthamor iranian.

Araqchi iu përgjigj komenteve të bëra një ditë më parë nga negociatori i lartë amerikan, Steve Witkoff, i cili kërkoi që Irani të ndalojë dhe eliminojë tërësisht pasurimin e uraniumit për të pasur një marrëveshje me SHBA.

“Ne kemi dëgjuar deklarata kontradiktore nga Witkoff, por pozicionet reale do të bëhen të qarta në tryezën e bisedimeve,” u shpreh Araqchi, sipas mediave shtetërore iraniane.

Bisedimet pritet të jenë vendimtare për fatin e marrëdhënieve SHBA-Iran dhe për të ardhmen e programit bërthamor të Republikës Islamike, që prej kohësh ka shkaktuar tensione në nivel ndërkombëtar.