Një rrëfim që ngjan me një skenar filmi ka marrë vëmendjen e medias ndërkombëtare, pasi një gazetë spanjolle publikoi detaje mbi rastin e Viktor Gjinit, ish-agjent i Shërbimit Informativ Shtetëror të Shqipërisë, i cili aktualisht po vuan një dënim prej 10 vitesh burg në Kili për trafik droge.
Sipas artikullit, emri i Gjinit u bë pjesë e një hetimi të gjerë mbi rrugët e trafikut të kokainës dhe metodat e sofistikuara të lëvizjes së parave të fituara nga ky aktivitet. Hetimi u zhvillua me ndihmën e DEA-s amerikane, e cila kishte infiltruar agjentë në rrjetin shqiptar që synonte zgjerimin e tregut të drogës deri në Amerikën e Jugut.
📌 Skema e trafikut dhe roli i Gjinit
Destinacioni i drogës: Holanda, ku Gjini zotëronte një pasaportë holandeze.
Bashkëpunëtori: Një tjetër shqiptar, Bryan Dragoti, i cili nuk u arrestua.
Metoda e zgjedhur: Përdorimi i Kilit si pikë tranziti, që sipas Gjinit ishte “më e sigurt” pasi kontejnerët nuk vidhen.
Lëvizja e parave – sistemi Hawala
Hetuesit zbuluan se paratë e trafikut lëviznin përmes sistemit tradicional Hawala, i cili nuk lë gjurmë bankare.
• Shqiptarët dorëzuan 90 mijë dollarë “El Polacos”, një ndërmjetës që mbante 8% komision.
Në Kili, dy shtetas kinezë do të dorëzonin 70 milionë peso kiliane në një hotel, si pjesë e marrëveshjes.
Per siguri, “El Polaco” i dha Gjinit një kartëmonedhë 1 dollarëshe me numër serial të fotografuar, që do të shërbente si “fjalëkalim” për të marrë paratë.
Çfarë tha Gjini në gjyq
Ish-agjenti mohoi akuzat, duke pretenduar se kishte ardhur në Kili për të blerë “rrotulla letre” dhe për të kërkuar mundësi biznesi.
Gjykata nuk gjeti prova të mjaftueshme për të provuar ekzistencën e një grupi të strukturuar kriminal, por vendosi:
• 10 vite burg për Gjinin;
• Lirim me mbikëqyrje për dy bashkëpunëtorët e tij.
Aktualisht, Gjini mbahet në burgun Santiago 1, ndërsa pret vendimin e Gjykatës së Apelit.
Ky rast ka ndezur debat mbi përfshirjen e ish-zyrtarëve të sigurisë në rrjete kriminale dhe mbi lidhjet ndërkombëtare të grupeve shqiptare të trafikut të drogës.
