Një 46-vjeçar është arrestuar nga policia e Tiranës me qëllim ekstradimin e tij drejt Italisë, pasi gjykata e Katanzaros në Itali ka caktuar “Arrest në burg” për veprën penale “Pjesëmarrja në grup kriminal, me qëllim trafikimin e narkotikëve”, sipas Kodit Penal të Italisë.

Sipas policisë, grupi kriminal ku merrte pjesë 46-vjeçari dyshohet se gjatë periudhës 2013-2018 ka trafikuar drejt Italisë sasi të konsiderueshme të lëndëve narkotike, kryesisht heroinë. Ai u kap dhe u arrestua provizorisht në Kavajë për t’u ekstraduar në Itali, ku ishte shpallur në kërkim ndërkombëtar. Interpol Tirana dhe Interpol Roma po bashkëpunojnë për të kryer ekstradimin e tij.

Më parë, më 17 korrik 2023, Prokuroria e Catanzaro në Itali mbylli hetimet për operacionin që zbuloi lidhjen midis eksponentëve të krimit shqiptar dhe atij italian të Catanzaro, të akuzuar për një grup kriminal që synonte trafikun e paligjshëm të drogës, zhvatjen dhe marrjen e mallrave të vjedhura. Sipas konkluzioneve të hetimeve, Arkez Dibrani ishte në krye të organizatës, me qendër në Shqipëri, nga ku drejtonte trafikun e drogës, ndërsa Samuel Garuja ishte një nga personat që u ndihmua për shpërndarjen e drogës në Catanzaro.