Pas ngjarjes së rëndë që ndodhi në burgun e Peqinit të premten e kaluar, Shërbimi i Kontrollit të Brendshëm në Sistemin e Burgjeve ka bërë të ditur se shtetasi dhe i dënuari, Indrit Shaqja, është arrestuar pas kërkesës së prokurorisë.

Në operacionin e zhvilluar më datë 19 Dhjetor, ora 21:00, Shaqja u kap në flagrancë për veprën penale “Futja dhe mbajtja e sendeve të ndaluara në Institucionet e Ekzekutimeve të Vendimeve Penale,” sipas neni 324/a/2 të Kodit Penal. Gjatë kontrollit në dhomën e akomodimit në IEVP Peqin, u zbulua një aparat celular i fshehur në arkën e sendeve ushqimore, i cili menjëherë u sekuestrua.

Në të njëjtën kohë, nga kontrolli i kryer u gjet edhe një predhë, e cila dyshohet të ketë lidhje me ngjarjen e vrasjes së viktimës A.LL që ndodhi më datë 15 Dhjetor 2023.

Materialet procedurale tashmë janë dërguar te Prokuroria e Shkallës së Parë të Juridiksionit të Përgjithshëm në Elbasan. Hetimet po vazhdojnë me intensitet për të zbardhur plotësisht ngjarjen e datës 15 Dhjetor 2023 dhe përfshirësit e tjerë në këtë ngjarje.