Banorët e 5 majit, të cilëve para disa ditësh IKMT ua prishi banesat, do të zhvillojnë një takim me Presidentin e Republikës Ilir Meta.
Po ashtu mësohet se në takim janë edhe përfaqësues të banorëve në dy zona të tjera të kryeqytetit, të cilët kanë të njëjtën problematike, ata të Paskuqanit dhe Laprakës.
Këto zona të Tiranës janë pjesë e projektit të bashkisë dhe qeverisë për rindërtimin, por banorët nga ana e tyre shprehen se nuk janë dakord me marrëveshjen e ofruar nga Bashkia për banesat që po shemben në kuadër të projektit të rindërtimit.
Presidenti Meta ka dalë në mbrojtje të kauzës së tyre. Ai herë pas herë kërkon që qeveria të diskutojë me ta, me qëllim zgjidhjen e problemit.
Vlen të përmendet, se banesat e disa prej qytetarëve janë prishur nga IKMT. Banorët kërkojnë që të kompensohen nga shteti dhe të kenë një marrëveshje me qeverinë.
Nga e saj qeveria dhe bashkia thonë se të gjithë banorët e prekur janë dëmshpërblyer.
Banorët kanë dalë edhe në protesta, ku pak ditë më para para kryeministrisë ata paralajmëruan se do të futen në grevë urie dhe nuk do të tërhiqen deri në vetëflijim.
