Izraeli dhe Hamasi kanë arritur një tjetër marrëveshje për të shkëmbyer trupat e katër pengjeve të vdekur izraelitë në këmbim të qindra të burgosurve palestinezë, vetëm disa ditë para përfundimit të fazës së parë të armëpushimit.

Sipas burimeve zyrtare, ndërmjetësit kanë zgjidhur ngërçin e fundit të marrëveshjes, duke ruajtur një armëpushim të brishtë që rrezikonte të shembej. Më herët, Izraeli kishte vonuar lirimin e 600 të burgosurve palestinezë, në shenjë proteste ndaj trajtimit të pengjeve gjatë lirimit të tyre nga Hamasi. Kjo vonesë u cilësua nga Hamasi si një “shkelje serioze” e armëpushimit.

Sipas marrëveshjes, Izraeli do të lirojë qindra të burgosur palestinezë, përfshirë gra dhe të mitur, ndërsa Hamasi do të dorëzojë trupat e katër pengjeve të vdekur izraelitë. Zyrtarët kanë konfirmuar se këtë herë nuk do të ketë ceremoni publike të shkëmbimit, duke shmangur situata të mëparshme të cilat ishin kritikuar nga Izraeli, OKB-ja dhe Kryqi i Kuq.

Kjo marrëveshje shënon përfundimin e fazës së parë të armëpushimit dhe hap rrugën për fazën e dytë, e cila do të përfshijë bisedimet për tërheqjen e plotë të Izraelit nga Rripi i Gazës. Armëpushimi, i ndërmjetësuar nga SHBA, Egjipti dhe Katari, ka ndalur përplasjet e ashpra 15-mujore pas sulmit të Hamasit më 7 Tetor, ku u vranë rreth 1,200 njerëz në Izrael dhe u morën peng rreth 250 persona.