Pas arritjes së marrëveshjes për fazën e parë të planit të Donald Trump për Gaza, qeveria izraelite miratoi pezullimin e menjëhershëm të sulmeve, duke vendosur një armëpushim që hyn në fuqi brenda 24 orëve.

Sipas marrëveshjes, të gjitha operacionet ushtarake, përfshirë bombardimet ajrore dhe ato me artileri, do të ndalohen, ndërsa trupat izraelite do të tërhiqen gradualisht, duke lënë kontroll mbi rreth 53% të enklavës bregdetare.

Një pjesë tjetër e marrëveshjes parashikon lirimin e pengjeve izraelite brenda 72 orëve, në këmbim të të burgosurve palestinezë. Kryeministri izraelit, Benjamin Netanyahu, e cilësoi këtë moment si “historik” dhe falënderoi ekipin e Presidentit Trump për kontributin në arritjen e këtij rezultati.

Kreu në ekzil i Hamasit, Khalil Al-Hayya, konfirmoi se pala palestineze ka marrë garanci nga SHBA për përfundimin e konfliktit. Aktualisht besohet se 20 pengje janë gjallë, 26 kanë vdekur dhe fati i dy të tjerëve mbetet i panjohur.

Pasi armëpushimi të hyjë në fuqi, kamionë me ndihma humanitare do të vërshojnë në Gaza, duke u ofruar ushqime dhe ndihmë mjekësore qindra mijëra civilëve të pastrehë pas shkatërrimeve të shkaktuara nga luftimet. Marrëveshja pritet të hapë rrugën për një proces më të qëndrueshëm paqësor mes palëve.