Një letër e mbushur me ndjesi faji dhe kërkim faljeje ka ardhur nga qelia ku ndodhet i burgosur Mark Samson, autori i vrasjes së 22-vjeçares shqiptare, Ilaria Sula. Ai i është drejtuar prindërve të saj, Flamur dhe Gëzime Sula, me fjalë që, sipas tij, nuk synojnë të justifikojnë, por vetëm të shprehin pendesë për një akt që tronditi opinionin publik.

Në letrën e tij, Samson shkruan:

“Po shkruaj nga qelia ime, ku do të qëndroj për disa vite. Çdo ditë mendoj për krimin mizor që kam bërë dhe nuk di çfarë të them, por mbi të gjitha nuk e di se çfarë më ka ndodhur.”

Ai pranon se fjalët nuk mjaftojnë për të lehtësuar dhimbjen që u ka shkaktuar të afërmve të Ilarias:

“Është e parëndësishme të kërkosh falje për dhimbjen që kam shkaktuar, por dua t’i kërkoj falje Ilarisë. Nuk e respektova kur ajo donte të më linte. U çmenda nga dhimbja dhe humba kontrollin.”

Duke e pranuar plotësisht përgjegjësinë për aktin që ka kryer, ai shprehet:

“Unë nuk jam duke u përpjekur të zvogëloj përgjegjësitë e mia ose të shpëtoj nga pasojat e veprimeve të mia. Unë jam gati të paguaj për mëkatet e mia pa asnjë justifikim.”

Letra, që prindërit e Ilarias ende nuk e kanë komentuar publikisht, është një përpjekje e vonuar për të treguar reflektim dhe ndoshta për të kërkuar shërim nga një plagë që, për familjen e të ndjerës, vështirë të mbyllet ndonjëherë.

Ngjarja mbetet një tjetër kujtesë e trishtë për pasojat fatale të dhunës në marrëdhënie dhe nevojën për ndërgjegjësim dhe mbrojtje më të fortë të jetës së grave.