Sulmuesi i kombëtares shqiptare, Jasir Asani, ka hedhur poshtë çdo spekulim për largim nga FC Esteghlal gjatë kësaj merkatoje. Përmes një postimi në rrjetet sociale, ai iu drejtua tifozëve, duke garantuar angazhim maksimal dhe besnikëri ndaj klubit iranian.

“Ditët e fundit kam dëgjuar thashetheme për largimin tim, por e vërteta është se kam folur me trajnerin dhe i kemi premtuar njëri-tjetrit se do të luftojmë së bashku për objektivat tona,” shkruan Asani. Sulmuesi ka theksuar se dëshira e tij është të qëndrojë në klub deri në arritjen e suksesit të madh dhe mbyll mesazhin me një deklaratë të prerë: “Jam këtu për dashurinë tuaj dhe nuk do të shkoj askund. Vetëm Esteghlal.”

Gjatë sezonit aktual, Asani ka shënuar 11 gola në 24 ndeshje, duke u bërë një nga lojtarët më vendimtarë të skuadrës.