Presidenti i SHBA Joe Biden, gjatë bisedimeve me presidentin polak Andrzej Duda, është shprehur se paqja në Evropë lidhet drejtpërdrejt me stabilitetin në Shtetet e Bashkuara.

“Aftësia e Amerikës për të përmbushur rolin e saj në pjesë të tjera të botës mbështetet në një Evropë të bashkuar, një Evropë të sigurt. Kemi mësuar nga përvoja në dy luftëra botërore, se sa herë kemi qëndruar jashtë dhe nuk jemi përfshirë në stabilitetin në Evropë, kjo gjithmonë na ka përndjekur ne, Shtetet e Bashkuara”, tha Biden.

Më pas vazhdoi: “E kam thënë për një kohë të gjatë, dikur si një senator, anëtar i Komitetit të Marrëdhënieve me Jashtë, si zëvendëspresident për 8 vjet, tani si President, se stabiliteti në Evropë është jashtëzakonisht i rëndësishëm për Shtetet e Bashkuara në kushtet e interesit tonë. Jo vetëm në Evropë, por në mbarë botën.”

Biden tha gjithashtu se ai dhe udhëheqësit e SHBA e shohin nenin 5 të NATO-s si “një angazhim të shenjtë”.

Sipas Nenit 5, sulmi ndaj një anëtari të NATO-s është sulm ndaj të gjithë anëtarëve.

Presidenti amerikan tha se homologu i tij rus Vladimir Putin mendonte se do të ishte në gjendje të ndante vendet e NATO-s me pushtimin e tij në Ukrainë.

“Kriteri i vetëm më i rëndësishëm është që NATO të qëndrojë tërësisht e bashkuar. Nuk ka ndarje në pikëpamjet tona. Çfarëdo që të bëjmë, të jetë në unison”, tha ai.