Eksperti i kriminalistikës Ervin Karamuço ka komentuar zhvillimin e fundit në lidhje me kërkesën e babait të Ervis Martinajt për shpalljen e tij zyrtarisht si të vdekur.

Në një intervistë për mediat, Karamuço theksoi se procedura ligjore fillimisht e trajton personin si të zhdukur, dhe vetëm në rast se gjendet trupi ose prova biologjike — si ADN — mund të shpallet zyrtarisht i vdekur.

“Kjo nuk do të thotë që personi ka vdekur në mënyrë kategorike. Ka pasur raste kur njerëz janë gjetur edhe pas 20 vitesh. Juridikisht mund të shpallet i vdekur, por faktikisht shteti nuk ka dhënë asnjë përgjigje,” – u shpreh Karamuço.

Eksperti sqaroi se deri më sot nuk është gjetur asnjë provë konkrete, as gjurmë, as ADN, dhe asnjë element që të çojë drejt një autori të mundshëm.

“Janë bërë kërkime kudo, por pa rezultat. Deri më tani kemi vetëm gojëdhëna dhe legjenda për atë se kush mund ta ketë vrarë apo pse. Asgjë nuk është e provuar me fakte,” – shtoi ai.

Karamuço e mbylli komentin duke theksuar se çështja Martinaj mbetet ende e paqartë, dhe se çdo vendim ligjor për shpalljen e tij të vdekur nuk përbën provë faktike, por një akt formal në mungesë të trupit ose provave materiale.