Justin Bieber është përmendur së fundmi në kuadër të hetimeve që po zhvillohen ndaj producentit të njohur Sean “Diddy” Combs, duke rikthyer në qendër të vëmendjes marrëdhënien e hershme mes këngëtarit dhe producentit gjatë viteve të adoleshencës.

Spekulimet nisën pasi u rishfaqën disa materiale arkivore ku Diddy flet për lidhjen e tij me Bieber-in në mënyrë që sot, në dritën e akuzave serioze ndaj tij, interpretohet ndryshe. Një shembull është intervista e vitit 2011 te “Jimmy Kimmel Live!”, ku Diddy shprehej me ironi: “Justin e di më mirë sesa të flasë për ato që bën me Big Brother Puff në televizion kombëtar” — një koment që ka ringjallur debat në rrjet.

Po ashtu, është rikthyer në qarkullim edhe një video e vitit 2009, ku Diddy i premtonte 15-vjeçarit Bieber se do ta linte të ngiste një nga makinat e tij luksoze kur të mbushte 16 vjeç, duke shtuar se do kalonin “48 orë bashkë”, diçka që e përshkruante si “ëndrra e çdo adoleshenti”.

Megjithatë, burime të afërta me Bieber-in kanë reaguar duke i hedhur poshtë me forcë spekulimet. Përfaqësues të këngëtarit i kanë thënë TMZ se “nuk ka pasur kurrë sjellje të papërshtatshme apo abuzim nga Diddy ndaj Justin Bieber.” Ata shtuan se komentet e dikurshme janë nxjerrë nga konteksti dhe se në të vërtetë Bieber kishte më shumë marrëdhënie miqësore me fëmijët e Diddy-t sesa me vetë producentin.

Në një deklaratë zyrtare, përfaqësuesi i Bieber tha:
“Edhe pse Justin nuk është viktimë e Sean Combs, ka individë që janë dëmtuar vërtet nga ai. Të zhvendoset fokusi nga kjo e vërtetë, dëmton drejtësinë që ata meritojnë.”

Kjo deklaratë synon të mbyllë spekulimet në lidhje me përfshirjen e Bieber-it, ndërkohë që hetimet ndaj Diddy vijojnë të zgjerojnë rrethin e të përmendurve në industrinë e muzikës dhe të argëtimit në SHBA.