Kryetari i PD-së, Lulzim Basha ka bërë deklaratën e parë këtë të premte, pak orë pasi publikoi vendimin e tij për të përjashtuar nga grupi parlamentar Sali Berishën.
Kreu i PD, Lulzim Basha ka deklaruar pas seancës në Kuvend se i vetmi armik është Edi Rama.
“Ka vetëm një armik, ai është Edi Rama”- ka folur shkurt Basha teksa po shkonte drejt selisë së demokratëve.
Kjo është një përgjigje pas akuzave që ka ngritur ish-kryeministri Sali Berisha ndaj kryedemokratit për “pazare të fëlliqura me Edi Ramën”.
Berisha ka hedhur një sërë akuzash në dy ditët e fundit mbi një marrëveshje të mundshme Basha-Rama për përjashtimin e tij nga grupi i PD.
Ditën e enjte, një ditë para se Kuvendi të mblidhej në seancën e parë plenare për këtë legjislaturë të re, Lulzim Basha shpalli vendimin e tij si kryetar i PD për të përjashtuar nga grupi parlamentar Sali Berishën.
Menjëherë Berisha e kundërshtoi vendimin e Bashës duke e akuzuar këtë të fundit për pakte me Edi Ramën dhe se ka qenë i detyruar pasi është kërcënuar me sanksione. Sot Berisha pavarësisht këtij vendimi shkoi dhe u paraqit në Kuvend, por si deputet i pavarur edhe pse pretendon se është anëtar i grupit parlamentar të PD.
