Përfaqësuesja e Bashkimit Evropian për Politikë të Jashtme dhe Siguri, Kaja Kallas, ka kritikuar ashpër pjesëmarrjen e presidentit serb, Aleksandar Vuçiç, në paradën ushtarake në Moskë, ku ai mori pjesë krah presidentit rus, Vladimir Putin. Në një deklaratë të bërë nga Varshava, Kallas theksoi se shtetet anëtare të BE-së kanë shumë pyetje rreth kësaj pjesëmarrjeje dhe për Vuçiçin, përkatësisht se kush është vërtet mik i Serbisë.

“Nga ana pozitive, ushtria serbe nuk po merr pjesë në paradë. Kjo do të kishte qenë një nivel tjetër, por sigurisht që mbetet në ndërgjegjen e këtyre njerëzve që shkojnë krah për krah me Putinin, i cili po zhvillon luftën më të madhe në Evropë që nga Lufta e Dytë Botërore”, tha Kallas. Ajo shtoi se shtetet anëtare të BE-së nuk po e “përtypin lehtë” këtë veprim dhe se kanë shumë pyetje për liderët që vazhdojnë të mbështesin Putinin.

Pjesëmarrja e Vuçiçit në paradën e Moskës ka shkaktuar reagime të ashpra nga BE, e cila kishte kërkuar që liderët e vendeve që synojnë anëtarësimin në Bashkimin Evropian, përfshirë presidentin serb, të shmangin pjesëmarrjen në ngjarje të tilla për shkak të agresionit të paprovokuar rus ndaj Ukrainës. Megjithatë, presidenti Vuçiç ka vendosur të injorojë paralajmërimet dhe të marrë pjesë në ceremoni, duke përkeqësuar më tej tensionet me Bashkimin Evropian.