Presidentja e Kosovës, Vjosa Osmani, njoftoi se ka mandatuar Glauk Konjufcën nga Lëvizja Vetëvendosje për të formuar Qeverinë e re të Kosovës. Sipas Kushtetutës, mandatari ka afat 15 ditë për t’i prezantuar Kuvendit përbërjen e ekzekutivit që duhet të marrë mbështetjen e të paktën 61 deputetëve.

Në një konferencë për media, Osmani tha se zhvilloi takime edhe me krerët e partive të tjera më të mëdha, të cilët i thanë se nuk dëshirojnë të propozojnë mandatar. Ajo theksoi:

“Është interes i qytetarëve që të kemi institucione dhe të bëhen çdo përpjekje të mundshme që të krijohen, që së paku të miratojnë vendime të rëndësishme në të mirë të qytetarëve,” duke përmendur **votimin e zgjatjeve buxhetore apo të një buxheti të ri për vitin 2026, si dhe ratifikimin e marrëveshjeve ndërkombëtare.”

Presidentja Osmani shtoi se është “shpresëplotë” që partitë të merren vesh për miratimin e Planit të Rritjes, buxhetit dhe zgjatjeve buxhetore, duke vlerësuar se LVV-ja ka gjasa të formojë ekzekutivin.

“Askund në Kushtetutë dhe aktgjykime nuk kërkohen garanci, kërkohen gjasa dhe ka dallim të madh mes garancisë dhe gjasës. Garancia jepet në Kuvend, kurse gjasat ofrohen në zyrën time. Sikur të ishin dy apo më shumë kandidatë, unë duhet ta shihja se kush i ka gjasat më të mëdha. Nga LVV-ja kanë besim të plotë se mund të arrijnë votat e nevojshme, por kjo u takon atyre që t’i bëjnë votat. Mua më takon që të bindem që kanë gjasa dhe mua më kanë bindur që kanë gjasa,” tha Osmani.

Ndërkohë, Glauk Konjufca u shpreh se dëshiron bashkëpunim me partitë shqiptare të përfaqësuara në Kuvend, por jo koalicion, duke shtuar se qeveria e tij do të miratojë buxhetin e ri, do të ratifikojë marrëveshje për Planin e Rritjes të Bashkimit Evropian dhe do të adresojë çështje urgjente, duke shmangur mundësinë e zgjedhjeve të parakohshme në dhjetor.

Kreu i LVV-së, Albin Kurti, nënvizoi mosbashkëpunimin e opozitës shqiptare, duke thënë:

“Është ndërtuar urrejtje hibride ndaj meje nga disa elementë të opozitës. Tash nuk jam unë. Le ta dëshmojnë se interesi i shtetit është mbi interesin partiak.”

Partitë e tjera shqiptare — PDK, LDK, AAK dhe Nisma Socialdemokrate — kishin kërkuar që Osmani të shpallë zgjedhje të reja, duke mos pranuar propozimin e LVV-së. Në zgjedhjet e 9 shkurtit, LVV-ja fitoi, por nuk arriti të sigurojë ulëse të mjaftueshme pa bashkëpunim me partitë tjera, ndërsa PDK-ja mori 24 ulëse, LDK-ja 20, AAK-ja pesë dhe Nisma tre. Lista Serbe ka nëntë ulëse të garantuara për komunitetin serb, ndërsa dhjetë ulëse të tjera i kanë përfaqësuesit e minoriteteve të tjera.