Kamala Harris ka pranuar një ftesë nga CNN për të marrë pjesë në një debat të dytë presidencial më 23 tetor. Ekipi i saj i fushatës e konfirmoi këtë, ndërsa Harris e njoftoi lajmin edhe përmes një postimi në platformën X, ku tha se e pranon ftesën me kënaqësi dhe shpreson që Donald Trump do të bashkohet në përballje.

“Do të pranoj me kënaqësi një debat të dytë presidencial më 23 tetor. Shpresoj që Donald Trump do të bashkohet me mua,” shkruajti Harris në X.

Ndërkohë, javën e kaluar, Trump sugjeroi se mund të merrte pjesë në një debat të tretë presidencial pas përballjes së tij të 10 shtatorit me Harris, të organizuar nga ABC në Filadelfia. “Ndoshta, nëse do të isha në humorin e duhur,” tha ai për gazetarët gjatë një vizite në Kaliforni.

Kjo deklaratë e Trump erdhi vetëm disa ditë pasi kishte postuar në Truth Social se nuk do të merrte pjesë në një debat të tretë, duke pretenduar se kishte fituar përballjen e mëparshme me Harris, pavarësisht se sondazhet tregonin të kundërtën.