Kancelarja gjermane, Angela Merkel vjen për herë të dytë në një vizitë zyrtare në Tiranë. Zyrtarja e lartë gjermane mbërriti në Rinas rreth orës 10:00, ku u prit nga ministrja e Punëve të Jashtme, Olta Xhaçka dhe ambasadori gjerman në Tiranë, Peter Zingraf.
Një delegacion i përbërë nga ambasadorë, ministrja e Jashtme e këshilltarë e kanë pritur Merkel në Pallatin e Brigadave para nisjes së takimit me kryeministrin Edi Rama.
Më pas eskorta ku udhëtonte kancelarja udhëtoi drejt kryeqytetit shqiptar, nën masa të rrepta sigurie, ku ndalesa e parë ishte Pallati i Brigadave. Aty e priti kryeministri Edi Rama. Gjithçka eshte e organizuar, ku në nder të kancelares gjermane u organizua dhe një ceremoni zyrtare.
Zyra e shtypit të kryeministrisë ka njoftuar mbi axhendën e kancelares ku në orën 14:35 pritet një konferencë e përbashkët me kreun e qeverisë Edi Rama.
Kancelarja ka zgjedhur pikërisht vendin tonë për të takuar liderët e Ballkanit Perëndimor në kuadër të ‘Procesit të Berlinit’. Mësohet se ky takim në Tiranë është edhe një tentativë e fundit që Merkel t’i japë një shtytje partisë së saj, Unionit Kristian-Demokratik (CDU), në zgjedhjet që pritet të mbahen më 26 shtator.
Kjo është vizita e fundit e Angela Merkel si kancelare në Ballkanin Perëndimor. Më vonë gjatë ditës së sotme, ajo do të zhvillojë takime dhe me 5 liderët e shteteve të Ballkanit Perëndimor.
