Edhe pse alkooli është shkaku kryesor i vdekjeve nga kanceri në Bashkimin Evropian, ndërgjegjësimi i publikut për këtë lidhje mbetet shqetësueshëm i ulët.

Një studim i Organizatës Botërore të Shëndetësisë (OBSH), i realizuar në 14 vende të Rajonit Evropian, zbuloi se:
•Vetëm 15% e të anketuarve e dinin që alkooli shkakton kancerin e gjirit;
•Vetëm 39% ishin të vetëdijshëm për lidhjen e tij me kancerin kolorektal.

Këto dy lloje të kancerit janë ndër më të zakonshmet në Europë, sidomos kanceri i gjirit te gratë dhe ai kolorektal te burrat, që kanë një lidhje të drejtpërdrejtë me konsumin e alkoolit.

Evropa, kontinent me konsum rekord të alkoolit

Evropa, ku përfshihet edhe Shqipëria, ka nivelin më të lartë të konsumit të alkoolit në botë, dyfish më shumë se mesatarja globale. Sipas të dhënave të OBSH, alkooli shkakton rreth 800 mijë vdekje çdo vit në Rajonin Evropian.

Një shqetësim tjetër është mungesa e masave parandaluese nga shumë vende të rajonit, përfshirë edhe Shqipërinë, për të reduktuar dëmet nga alkooli.

Mungesa e etiketave paralajmëruese

Në nivelin e Bashkimit Evropian, etiketat që paralajmërojnë për rreziqet shëndetësore të alkoolit janë të detyrueshme vetëm në 3 nga 27 vendet e BE-së dhe në vetëm 13 nga 53 shtetet e Rajonit Evropian.

Kjo mungesë informacioni i lë konsumatorët të pavetëdijshëm për rreziqet me të cilat përballen. Ekspertët e shëndetësisë kërkojnë masa më të forta, si:
•Fushata ndërgjegjësimi mbi rreziqet e alkoolit,
•Rritja e taksave mbi pijet alkoolike,
•Kufizime në reklamat e alkoolit,
•Etiketim të detyrueshëm mbi rreziqet shëndetësore.

Me normat alarmante të konsumit të alkoolit, ndërgjegjësimi i popullatës dhe politikat e forta shëndetësore janë thelbësore për të parandaluar rritjen e rasteve të kancerit dhe vdekjeve të lidhura me alkoolin.