Në një atmosferë të mbushur me solemnitet dhe siguri të skajshme, më 7 maj nis zyrtarisht konklava në Kapelën Sistine, ku 133 kardinalë nën moshën 80 vjeç nga e gjithë bota janë mbledhur për të zgjedhur pasuesin e Papa Françeskut.

Kapela Sistine është kthyer në një nga hapësirat më të izoluara dhe të ruajtura në planet, ku teknologjia e lartë dhe masat fizike të kontrollit garantojnë sekretin absolut të votimeve. Dritaret janë të pajisura me filma anti-dron, telefonat e ndaluar, sinjalet e bllokuara dhe Garda Zvicerane patrullon çdo cep, ndërsa shtëpia Santa Marta u evakuua dhe kontrollua më parë në detaj.

Tymi i bardhë do të lajmërojë zgjedhjen e një Pape të ri; tymi i zi, dështimin e votimit. Tymi i parë pritet të ngjitet nga oxhaku i çatisë së Kapelës Sistine rreth orës 19:00, ndërsa konklava nis në orën 16:30 me një raund të parë votimi.