Policia kufitare malazeze ka sekuestruar 35 kilogramë marijuanë të dyshuar si të trafikuar nga Shqipëria, gjatë një kontrolli rutinë në rrugën Grabon – Dinoshë. Lënda narkotike u gjet në një automjet të drejtuar nga një 24-vjeçar me inicialet E. M., banues në Tuz, i cili u arrestua menjëherë.

Sipas njoftimit zyrtar nga Drejtoria e Policisë, droga ishte e ndarë në 62 pako, të vendosura në dy thasë dhe një qese në bagazhin e makinës. Pas kapjes, policia njoftoi Prokurorinë e Lartë të Shtetit në Podgoricë, e cila ka nisur hetimet për zbardhjen e plotë të rastit.

I riu po hetohet për veprën penale të prodhimit dhe trafikimit të paautorizuar të drogës, ndërsa hetimet pritet të zbulojnë edhe rrjetin e mundshëm të përfshirë në këtë trafik. Policia po punon gjithashtu për të konfirmuar nëse lënda narkotike është trafikuar përmes kufirit shqiptar.