Kardinali Giovanni Angelo Becciu, një nga figurat më të fuqishme në Vatikan, ka njoftuar se nuk do të marrë pjesë në Konklavën që do të zgjidhë drejtuesin e ri të Kishës Katolike. Ai tha se ky vendim ishte marrë për të respektuar vullnetin e Papa Françeskut dhe për të ruajtur unitetin e Kishës.

“Kam vendosur t’i bindem, siç kam bërë gjithmonë, vullnetit të Papa Françeskut për të mos hyrë në Konklavë, teksa insistoj në pafajësinë time,” shprehu ai.

Kardinali Becciu, 76 vjeç, ndodhet aktualisht në pritje të gjykimit të shkallës së dytë pas një dënimi me pesë vjet e gjashtë muaj burgim dhe ndalim të përhershëm nga postet publike për keqmenaxhim fondesh dhe mashtrim kundër Selisë së Shenjtë. Ai ishte i përfshirë në një çështje të njohur lidhur me investimin në një ndërtesë luksoze në Sloane Avenue në Londër, për të cilën ka insistuar se është i pafajshëm.

Konklava për zgjedhjen e Papës të ri do të nisë më 7 maj, pas ndarjes nga jeta të Papa Françeskut. Procesi do të vazhdojë me dy votime në mëngjes dhe dy në pasdite, derisa të zgjidhet Papa i ri me një shumicë të kualifikuar prej dy të tretash.

Zhvillimet në Konklavë do të drejtohen nga Kardinali Pietro Parolin, ndërsa bisedimet mes kardinalëve kanë filluar për të ndihmuar në krijimin e konsensusit për udhëheqësin e ardhshëm të Kishës Katolike.

Vendimi i Becciu, një nga figurat më të përfolura të Vatikanit, bën që procesi i zgjedhjes së Papës të jetë edhe më i ndjeshëm. Sytë e botës tani janë drejtuar nga Vatikani për zhvillimet e ardhshme.