Sulmuesi i ri i Borussia Dortmund, Karim Adeyemi, ka shprehur dashurinë e thellë për klubin e tij aktual, duke deklaruar publikisht se e ndjen veten plotësisht si në shtëpi në “Signal Iduna Park” dhe se nuk do të kishte aspak pendesë nëse do të qëndronte atje për gjithë karrierën.

Në një konferencë për shtyp gjatë Kupës së Botës për Klube, 23-vjeçari nuk i kurseu fjalët e ngrohta për klubin gjerman, duke rikujtuar se ka qenë tifoz i Dortmundit që në fëmijëri.

“Gjithmonë e kam thënë se e dua këtë klub. Isha tifoz kur isha lojtar i ri – edhe familja ime,” – tha ai.

Adeyemi u ndal me respekt edhe te figura e Marco Reus, një ikonë e Dortmundit që së fundmi u largua pas një dekade besnikërie:

“Kur mendoj për Marco Reus, i cili dha gjithçka për këtë klub dhe gjithmonë ka mbetur besnik, mendoj se do të ishte çmenduri të thoja se dua të ndjek hapat e tij. Kanë mbetur edhe disa vite, por siç thashë, ndihem mirë këtu dhe nëse do të luaja për këtë klub përgjithmonë, nuk do të pendohesha aspak.”

Megjithatë, lojtari ndërkombëtar i Gjermanisë tregoi edhe realizëm për të ardhmen:

“Nuk e di kurrë se ku do të të çojë rruga, çfarë do të sjellë jeta, por për momentin, gjithçka është në rregull këtu.”

Karim Adeyemi iu bashkua Dortmundit nga RB Salzburg në verën e vitit 2022 për rreth 30 milionë euro, dhe që nga atëherë ka treguar potencial të madh, edhe pse lëndimet dhe forma jo gjithmonë konstante kanë ndikuar në vazhdimësinë e tij.

Fjalët e tij vijnë si një sinjal i fortë për qëndrueshmëri dhe përkushtim, një vlerë gjithnjë e më e rrallë në futbollin modern, ku transferimet dhe ofertat milionëshe shpesh prishin lidhjet mes lojtarëve dhe klubeve. Në rastin e Adeyemit, zemra i duket e verdhë dhe e zezë, për momentin dhe ndoshta… përjetësisht.