E hëna pritet të shënojë fundin e betejës së Komisionit të Ankimeve dhe Sanksioneve (KAS) mbi procesin zgjedhor të 11 majit, me vendimet për katër qarqet e fundit që iu nënshtruan rinumërimit: Elbasani, Tirana, Fieri dhe Durrësi.

Megjithëse kutitë u rihapën për verifikim, nuk pati ndryshime në shpërndarjen e mandateve, ndërsa u evidentuan disa shkelje procedurale, veçanërisht në qarkun Fier dhe Durrës, për shkak të një numri të lartë votash preferenciale që po konsiderohen si shkak i mundshëm për hetime të mëtejshme.

Nëse KAS rrëzon kërkesat për rivotim, e vetmja hallkë ligjore e mbetur për opozitën mbetet Kolegji Zgjedhor, i cili deri tani ka rrëzuar të gjitha ankimimet e depozituara nga Partia Demokratike dhe aleatët e saj.

Pas përfundimit të kësaj faze, Komisioneri Shtetëror i Zgjedhjeve, Ilirjan Celibashi, pritet të procedojë me certifikimin e mandateve për 140 deputetët e parlamentit të ri, duke vulosur zyrtarisht përbërjen e Legjislaturës së 11, që nis punën në shtator.

Rezultatet zyrtare deri tani:
• Partia Socialiste (PS): 83 mandate
• Partia Demokratike dhe aleatët: 50 mandate
• Parti të vogla: 7 mandate

Me këtë përfundim, PS garanton shumicën parlamentare, ndërsa opozita mbetet në kufijtë e një përfaqësimi të dobët, me akuzat për manipulime që nuk kanë gjetur mbështetje në shkallët e deritanishme të shqyrtimit.

Tashmë vëmendja zhvendoset te Kolegji Zgjedhor, si instanca e fundit që do të vendosë nëse do të ketë ndonjë zhvillim befasues, ndonëse gjasat për këtë mbeten minimale.