Autoritetet argjentinase kanë nisur një hetim penal tronditës ndaj një 37-vjeçari në provincën veriperëndimore të Jujuy, i cili dyshohet për vrasjen brutale dhe copëtimin e të paktën pesë personave në shtëpinë e tij. Zyra e prokurorit konfirmoi për agjencinë AFP se burri është arrestuar dhe përballet me akuza për “vrasje seriale me rrethana rënduese”, për shkak të “mizorisë” me të cilën janë kryer krimet.

Hetimet nisën pas zhdukjes së disa personave – shumica prej tyre të pastrehë dhe të moshuar – të cilët u panë për herë të fundit në afërsi të shtëpisë së të dyshuarit. Pamjet nga kamerat e sigurisë e çuan policinë drejt banesës së tij, ku u gjetën prova të tmerrshme: kocka, gjak, pjesë lëkure dhe madje edhe një hundë njerëzore.

Një kthesë e papritur në hetim erdhi nga një djalë 16-vjeçar, i cili u identifikua si nipi i të dyshuarit. Ai pranoi para oficerëve:
“Dua të flas, dua të them se çfarë ka ndodhur”, dhe më pas rrëfeu me detaje mizoritë.
Sipas tij, xhaxhai i ftonte viktimat në shtëpi nën pretekstin e punësimit dhe më pas:
“I rrihte, i vriste, i priste në copa, i digjte dhe i hidhte jashtë në qese plehrash”.

Prokurori i përgjithshëm i Jujuy-t, Sergio Lello Sánchez, deklaroi se autoritetet janë në proces të analizimit të mbetjeve njerëzore të gjetura në vendngjarje dhe po mbledhin mostra ADN-je nga të afërmit e personave të zhdukur për identifikim. Sipas tij, viktimat ishin kryesisht njerëz vulnerabël, që jetonin në rrugë dhe nuk kishin asnjë mbrojtje.

Ndërkohë, shtëpia është kthyer në një skenë krimi e mbyllur për hetuesit forensikë, ndërsa pritet që numri i viktimave të jetë edhe më i lartë sesa mendohet aktualisht.
Hetimi është në zhvillim dhe pritet të tronditë jo vetëm opinionin publik vendas, por edhe më gjerë, për shkak të natyrës makabre të ngjarjes.