Stuhitë musonike kanë goditur Azinë Juglindore, duke shkaktuar përmbytje dhe rrëshqitje të mëdha dhe lënë pas më shumë se 1,000 viktima dhe qindra të zhdukur në katër shtete: Sri Lanka, Indonezi, Tajlandë dhe Malajzi.

Në Sri Lanka dhe Indonezi, ushtria është vendosur për të ndihmuar në operacionet e shpëtimit, ndërsa rrugët mbeten të bllokuara nga balta dhe rrënojat e stuhisë. Presidenti indonezian Prabowo Subianto njoftoi dërgimin e helikopterëve dhe aeroplanëve për të arritur zonat më të prekura, duke theksuar se prioriteti i qeverisë është shpëtimi i të bllokuarve.

Në Sri Lanka, të paktën 334 persona kanë humbur jetën, ndërsa qindra të tjerë janë ende të zhdukur. Operacionet e shpëtimit po zhvillohen me helikopterë ushtarakë dhe ekipe emergjente që pastruan rrugët e bllokuara nga pemët dhe balta e rrëzuara. Presidenti Anuradha Kumara Dissanayake ka shpallur gjendje të jashtëzakonshme dhe paralajmëron se rindërtimi pas katastrofës do të jetë më i madhi dhe më i vështiri në historinë e vendit.

Në Tajlandën jugore, 176 persona kanë vdekur, ndërsa në Malajzi dy viktima raportohet në shtetin Perlis. Qeveritë përkatëse kanë ndërmarrë masa emergjente, por kritikat për menaxhimin e krizës po rriten, duke çuar edhe në shkarkimin e dy zyrtarëve lokalë.

Ekspertët paralajmërojnë se stuhitë musonike pritet të vazhdojnë, duke rritur rrezikun për jetët e banorëve dhe dëmet materiale në rajonin e Azisë Juglindore.