Nisur nga situata e krijuar në vendin tonë për shkak të përhapjes së gripit të shpendëve, zv/ministrja e Bujqësisë Ermira Gjeci ka folur për ndikimin e kësaj sëmundje te konsumatorët.

Ajo u shpreh se është tërhequr e gjithë prania e vezëve nga tregu ndërsa shtoi se konsumatorët duhet të drejtohen në njësitë e autorizuara.

“Shërbimet janë në terren duke monitoruar situatën. Autoriteti Kombëtar i Ushqimit është në terren, jo tani që u konfirmua rasti i parë me gripin e shpendëve por edhe më parë.

Është tërhequr e gjithë prania e vezëve nga tregu, megjithëse ne kemi thënë se nuk përbën rrezik. Konsumatori duhet të drejtohet në të gjitha njësitë e autorizuara për blerjen e produkteve pasi vetëm kështu mund të sigurohet garancia e tyre.

Kemi ndaluar tregtinë e shpendëve të gjallë. Në supermarket është e kontrolluar çdo gjë dhe konsumatori duhet të jetë i qetë”, deklaroi Gjeci.