Një ngjarje e rëndë familjare është parandaluar falë ndërhyrjes së menjëhershme të Policisë në fshatin Qerekë të Krujës. Një 41-vjeçar, i identifikuar si E. V., është arrestuar pasi kanoste me armë zjarri anëtarët e familjes së tij.

Sipas njoftimit zyrtar të Policisë, ngjarja u raportua në banesën e shtetasit në fshatin Qerekë, ku ai po kërcënonte me armë zjarri kallashnikov familjarët. Pas marrjes së informacionit, shërbimet e Komisariatit të Policisë Krujë, në bashkëpunim me Komisariatin Nr. 5 në Tiranë, organizuan një operacion të menjëhershëm.

Policia bëri të ditur se gjatë kontrollit në banesën e të arrestuarit, u sekuestruan një armë automatike kallashnikov dhe dy armë gjahu, që ndodheshin në mënyrë të paligjshme në banesë.

“Ndërhyrja e shpejtë parandaloi një ngjarje të mundshme kriminale,” – thuhet në deklaratën e Policisë.

Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore.

Policia po vijon hetimet për të sqaruar motivet dhe rrethanat e plota të ngjarjes.