Gjatë sezonit të verës, kur fluksi i udhëtarëve është më i lartë, Aeroporti Ndërkombëtar i Tiranës (TIA) është i përkushtuar për të siguruar që udhëtimi juaj të jetë sa më i qetë dhe i këndshëm. Ja disa këshilla të dobishme për të bërë përvojën tuaj në aeroport më të lehtë:

1. Mbërritja në Aeroport:
– Për të shmangur stresin e minutave të fundit, rekomandojmë të mbërrini në aeroport të paktën 3 orë përpara orarit të fluturimit tuaj

2.Printimi i Kartës së Imbarkimit (Boarding Pass):
– Sigurohuni që të keni me vete kartën e imbarkimit të printuar. Kjo do t’ju kursejë kohë dhe do të lehtësojë procesin e kalimit nëpër pikat e kontrollit të sigurisë. Nëse nuk e keni printuar paraprakisht, duhet të prisni hapjen e sportelit të check-in për ta marrë atë.

3.Kalimi i Bagazheve:
– Sporteli i check-in zakonisht hapet 2 orë e 30 minuta përpara nisjes së fluturimit. Nëse nuk keni printuar boarding pass-in paraprakisht, mund ta merrni në sportelin e check-in kur të hapet.

4.Qëndroni të Informuar:
– Qëndroni të përditësuar me çdo njoftim nga linja ajrore për fluturimin tuaj. Përdorni ekranet e informacionit të aeroportit ose faqen zyrtare të internetit të aeroportit për përditësime në kohë reale mbi ndryshimet e portës, vonesat apo informacione të tjera të rëndësishme.

Ekipi i TIA është gjithmonë i gatshëm për t’ju ndihmuar në çdo hap, duke siguruar që udhëtimet tuaja verore të fillojnë sa më mirë. Udhëtim të mbarë!