Lideri i Koresë së Veriut, Kim Jong Un, ka lëshuar një tjetër paralajmërim të ashpër mbi përdorimin e armëve bërthamore në konfliktet e mundshme me Korenë e Jugut dhe Shtetet e Bashkuara, sipas mediave shtetërore. Ai i akuzoi këto dy vende se po provokojnë Korenë e Veriut dhe po përshkallëzojnë tensionet në Gadishullin Korean.
Gjatë një fjalimi të mbajtur në Universitetin e Mbrojtjes Kombëtare Kim Jong Un, lideri korean tha se “Koreja e Veriut do t’i përdorë pa ngurrim të gjitha armët sulmuese kundër armiqve”, nëse ata përpiqen të përdorin forcat e tyre të armatosura kundër vendit. Ai shtoi se nuk përjashtohet as mundësia e përdorimit të armëve bërthamore.
Ky paralajmërim vjen në një kohë kur analistët besojnë se Koreja e Veriut mund të rrisë tensionet përpara zgjedhjeve presidenciale në SHBA. Kim gjithashtu theksoi nevojën për të përmirësuar qëndrimin bërthamor të vendit, për shkak të aleancës së përforcuar ushtarake mes Koresë së Jugut dhe SHBA-së, veçanërisht me përfshirjen e armëve bërthamore amerikane në planifikimin strategjik të përbashkët.
Në përgjigje të këtyre kërcënimeve, zyrtarët e SHBA-së dhe të Koresë së Jugut kanë paralajmëruar se çdo përdorim i armëve bërthamore nga Koreja e Veriut do të kishte pasoja të rënda, duke përfshirë fundin e regjimit të Kimit.
Tensionet në Gadishullin Korean janë rritur kohët e fundit, pas zbulimit të një objekti të ri për prodhimin e uraniumit të gradës ushtarake në Korenë e Veriut, si dhe një seri testimesh të raketave. Analistët spekulojnë se Peniani mund të përpiqet të tërheqë vëmendjen e SHBA-së përmes provokimeve të reja, si një test bërthamor ose testimi i raketave me rreze të gjatë. Këto veprime mund të synojnë lehtësimin e sanksioneve, veçanërisht pas ndryshimeve të mundshme në administratën e ardhshme të SHBA-së.
