Ministri i Jashtëm i Kinës e ka quajtur vizitën e kryetares së Dhomës së Përfaqësuesve të SHBA-së, Nancy Pelosi në Tajvan si “maniake, të papërgjegjshme dhe irracionale”.

Duke folur gjatë një takimi që po mbahet mes ministrave të Jashtëm të Azisë Juglindore në kryeqytetin e Kamboxhias, Phnom Penh, Wang Yi tha se vendi i tij kishte bërë gjithçka që mundej për të shmangur një krizë, por se ai nuk mund të “lejojë që interesat e tij thelbësore të cenohen”.

Wang bëri një deklaratë provokuese kur tha se Tajvani “përfundimisht do të kthehet në duart e atdheut”.

Komentet e Wang Yi erdhën pasi ministrat e jashtëm të Azisë Juglindore kishin paralajmëruar më herët se tensionet në rritje mbi Tajvanin mund të nxisnin konflikt të hapur në rajon.

Shoqata e Kombeve të Azisë Juglindore (ASEAN) bëri thirrje për përmbajtje maksimale dhe u shpreh kundër çdo veprimi provokues.

Në deklaratë Shoqata thotë se zhvillimet e fundit mund të çojnë në “llogari të gabuara, konfrontim serioz, konflikte të hapura dhe pasoja të paparashikueshme midis fuqive të mëdha”.

Qeveria kineze ka kërcënuar se përfundimisht do të pushtojë ishullin me forcë nëse përpjekjet e tjera për bashkim janë të pasuksesshme.

Në takimin të enjten e 4 gushtit, Wang Yi mori në mbrojtje stërvitjet ushtarake të Kinës në detet rreth Tajvanit, të mbajtura në përgjigje të vizitës së Pelosit.

Zonja Pelosi është politikania më e lartë amerikane që ka vizituar ishullin e Tajvanit në 25 vjet.

Vendimi i saj për të ndaluar në ishull ka zemëruar Pekinin, i cili e konsideron Tajvanin si një provincë të shkëputur të Kinës.

SHBA nuk e njeh zyrtarisht Tajvanin, por mban një marrëdhënie të fortë me ishullin, e mes tyre shet dhe armë që Tajvani të ketë mundësi për t’u mbrojtur.