Kina po tregon shenja të qarta të tërheqjes nga lufta tregtare me Shtetet e Bashkuara, duke ndërmarrë hapa konkretë për të lehtësuar tensionet që prej kohësh kanë rënduar mbi ekonominë globale. Vendimi për të dhënë përjashtime tarifore për disa importe amerikane dhe për të shqyrtuar heqjen e tarifave të larta mbi produkte të caktuara tregon një ndryshim të kujdesshëm në qëndrimin e Pekinit. Kjo lëvizje vjen si përgjigje ndaj presionit të brendshëm ekonomik dhe trysnisë së bizneseve vendase, të cilat janë goditur rëndë nga masat ndëshkuese të vendosura gjatë administratës së Donald Trump.

Për më tepër, Pekini duket i gatshëm të japë sinjale bashkëpunimi, ndonëse ende mohon zyrtarisht bisedime të drejtpërdrejta me Uashingtonin, duke u përpjekur të ruajë pozicionin diplomatik pa u interpretuar si i dobët në arenën ndërkombëtare.

“Zmbrapsja” e Kinës

Sipas “Financial Times”, Pekini ka dhënë disa përjashtime tarifore për importet nga SHBA dhe po vlerëson, me Ministrinë e Tregtisë, mundësinë e eliminimit të tarifave prej 125%, si një masë lehtësimi për kompanitë e goditura nga strategjia e Donald Trump. Sipas Michael Hart, kreut të Dhomës Amerikane të Tregtisë në Kinë, kompani në sektorë si aviacioni, kimikatet industriale dhe mikroçipet kanë përfituar nga pezullimi i tarifave, ndërkohë që po shqyrtohet edhe heqja e tarifave për importet e produkteve mjekësore.

“Është mirë të shohësh që të dyja palët po rishikojnë tarifat dhe duket sikur kanë filluar të përpilojnë lista përjashtimi për kategori të veçanta,” tha Hart. Ai përmendi gjithashtu që disa kompani kanë pasur dërgesa të fundit që nuk i janë nënshtruar detyrimeve doganore.

Përjashtimet tarifore

Ministria e Tregtisë e Kinës nuk ka dhënë komente zyrtare mbi përjashtimet tarifore, ndërsa Ministria e Jashtme ka mohuar njohuritë për pezullime të detyrimeve, duke këmbëngulur se nuk ka pasur bisedime të drejtpërdrejta me SHBA. Kjo deklaratë bie në kontrast me ato të Donald Trump.

Biseda Trump-Xi

Presidenti amerikan Donald Trump zbuloi se kishte zhvilluar një bisedë telefonike me homologun e tij kinez Xi Jinping. “A më thirri ai? Po. Dhe nuk mendoj se kjo është një shenjë dobësie nga ana e tij,” tha Trump për “The Times”, duke shtuar se priste një marrëveshje midis dy vendeve në javët e ardhshme.

Trump gjithashtu pretendoi, pa ofruar prova, se kishte arritur 200 marrëveshje që do të finalizoheshin brenda tre deri në katër javësh. Shtëpia e Bardhë ka sinjalizuar së fundmi një zbutje të qëndrimit ndaj Kinës, duke u shprehur se bisedimet po ecin në drejtimin e duhur.

Nga ana e saj, Kina vazhdon të mohojë kontaktet direkte me Uashingtonin dhe nënvizon nevojën për të përmirësuar aftësitë për të parashikuar skenarë ekstremë dhe për të menaxhuar rreziqet tregtare.

Teksa largohej nga Shtëpia e Bardhë të Premten, Trump u shmang nga komentet e mëtejshme mbi bisedën me Xi, duke thënë thjesht: “Kam folur me të shumë herë.”