Segmenti i rrugës së Automotoparkut në Elbasan është dëmtuar, duke nxitur reagimin e deputetes së Partisë Demokratike për qarkun, Klodiana Çapja. Ajo e ka cilësuar situatën si një skandal të rëndë, duke theksuar se për këtë projekt janë investuar qindra miliona euro.

“Denoncoj publikisht një tjetër skandal të rëndë që lidhet me një investim qindra miliona eurosh, siç është Automotoparku i Elbasanit. Kjo nuk është amortizim normal, por provë e qartë e një skandali tjetër në infrastrukturë, që tregon hapur punime pa standarde, mungesë kontrolli dhe keqpërdorim të fondeve publike”, u shpreh deputetja.

Çapja kërkoi ndërhyrje të menjëhershme për të verifikuar situatën, duke theksuar nevojën për hetim teknik dhe financiar.

“Qytetarët e Elbasanit dhe të gjithë Shqipërisë nuk meritojnë projekte fasadë që shemben pa u inauguruar siç duhet. Kërkoj auditim të menjëhershëm teknik dhe financiar, transparencë të plotë mbi kontratat dhe mbajtje përgjegjësie për çdo institucion dhe subjekt të përfshirë”, nënvizoi më tej ajo.

Deri më tani nuk ka një reagim zyrtar nga institucionet përgjegjëse lidhur me pretendimet e ngritura.