Ministrja e Punëve të Brendshme, Albana Koçiu, pas një takimi me Shtabin e Emergjencave, deklaroi se situata në qarkun e Shkodrës, e krijuar nga reshjet e dendura të orëve të fundit, është aktualisht nën kontroll dhe se nuk ka raportime për problematika.

Koçiu bëri me dije se të gjitha strukturat përgjegjëse, në nivel vendor dhe qendror, janë në terren dhe po monitorojnë nga afër situatën jo vetëm në Shkodër, por edhe në qarqe të tjera të prekura nga moti i keq, si Durrësi, Kukësi, Fieri dhe Vlora.

“Vendi është përballur me reshje intensive gjatë 24 orëve të fundit dhe parashikimet tregojnë se kjo situatë do të vijojë edhe nesër. Për këtë arsye, institucionet janë të gjitha në gatishmëri për të shmangur çdo situatë problematike,” u shpreh ministrja.

Sa i përket Shkodrës, ajo theksoi se po monitorohen me kujdes shkarkimet e lumit Buna dhe niveli i liqenit të Shkodrës, me qëllim parandalimin e përmbytjeve në zonat urbane dhe tokat bujqësore. Pas mbledhjes së Komitetit të Emergjencave në Bashkinë e Shkodrës, Koçiu konfirmoi se aktualisht nuk ka probleme dhe se situata po mbahet nën kontroll në bashkëpunim me KESH-in dhe strukturat e tjera përgjegjëse.

Ministrja nënvizoi se monitorimi do të vijojë gjatë gjithë natës dhe paradites së nesërme, që konsiderohet fazë emergjence, ndërsa shpresohet që nga pasditja e nesërme të ketë një përmirësim të kushteve të motit.

Në fund, Koçiu u bëri thirrje qytetarëve të tregojnë kujdes të shtuar dhe të ndjekin rekomandimet e autoriteteve vendore dhe qendrore gjatë kësaj periudhe me reshje intensive.